بومشاهد ع الخط

تصغير
تكبير
• مساء الخير بومشاهد ومبروك على قرار وقف إزالة السلالم، أشعليك اقولون شايفينك شاق الضحكة.
- بومشاهد: جنك تدري يالحبيب أحلى قرار سمعته من زمان، يا أخي والله الكويتيين يستاهلون كل خير، وبذمتك موحرام ثلاث ترباع البيوت تتكسر، تقول مقصوفة من بي52 ، والناس تخسر فلوس ومحد راح يستفيد إلا العمال، وبعدين والله موغلطتنا، البلدية ظلوا ساكتين هالسنين اللي طافت والحين صحوا فجأة.
• تصدق عاد ماتوقعت الحكومة تتعاطف مع الناس في هالموضوع، لان صارلها فترة مشلخة الناس شلخ وماترد على مجلس الامة واللي تبيه تسويه، مادري هالحنية من وين إنزلت عليها.
- بومشاهد: بصراحة الكويتي صار ينطبق عليه مثل «ارحموا عزيز قوم ذل» ويكسر الخاطر لاحول ولاقوة له، وبعض الاعضاء قام ادش في أمور تافهة، أبوك وأمك وجدك وخالك وعمتك، ومعاير بينهم غير نمونه، والله يوم كنا صغار في المدارس مانسوى جذيه، وخاصة بورمية مصخها حيل.
• متلاحظ هالامور صارت بزيادة داخل المجلس، يا أخي كلهم كويتيين، وبالعكس اختلاف الاطياف بينهم يزيدهم قوة مايضعفهم، وفي كل دول العالم في ناس من الجنوب والشمال وتختلف اللهجات بينهم بس بالنهاية الوطن يجمعهم كلهم.
- بومشاهد: تدري شنو السبب لان الكويت قامت تفتقد الانجازات في كل شي، وتحط حرتها في الاشياء التافهة، تخيل لو منتخب الكويت للقدم متأهل كأس العالم ماتهقي أن الناس كلهم راح يكونون على قلب واحد واحنا جربنا هالشي لما كنا أنفوز بأى بطولة، تشوف الناس كلهم مستانسين وفرحانين من بدو وحضر.
• كلامك صج حتى الفن الكويتي صار «ملييق» ودمه ثقيل لا من مسلسلات حلوة ولا مسرحيات سنعة صارت كلها سب وطنازة وهواش، وأي واحد ولا وحدة من الشارع تقدر تمثل بسهولة.
- بومشاهد: وين دخلتنا في هالامور هذه، وقلبت هالمواجع احنا ناقصين بروح البرازيل بعد طلعت من كأس العالم .
• خلاص قربت تخلص البطولة وبنرد مرة ثانية حق رياضتنا اللي تجيب « الماحي».
- بومشاهد: تصدق عاد مادري ليش ما أحس أن الناس استمتعت بهالبطولة، فيها شي مادري شنو موحلو.
• يمكن علشان إيطاليا وانكلترا والبرازيل والارجنتين اطلعوا مبجر.
- بومشاهد: لا والله لان ويهك القبسة وصوتك الخايس أسمعه كل يوم... وأدري راح تطلعلي مرة ثانية بعد أربع سنوات بس انشالله أكون لنا عمر... «ونديها سامبا»
الأكثر قراءة
يومي
اسبوعي