المصري أفندي / فواتير وطراطير..!!
| د. سعيد فهمي |
الله يجازي ويسامح اللي نصحنا باللي اسمه الانفتاح.. واللي خلى ناس نزلت علينا من السما وبالنفوذ والمصالح كل شيء بقى ليهم مباح.. واللي انفتحت ليهم أبواب السما والأرض والمسألة بقت سداح مداح.. وطاحوا علينا في كل المجالات وخير بلدنا بقى داخل جيوبهم كل صباح.. يا أخي تلاقيهم في كل المجالات وكل شيء بقى ليهم متاح.. وهدفهم لذيذ قوي وظريف بيسموه اللي اسمه إيه ده ولا موأخذه الاصلاح.. وغريبة يا أخي تلاقي البنوك بتمولهم بالملايين مع خالص التحية وفوق البيعة فترة سماح.. والمواطن الغلبان لا يقدر ياخد سلفة بسيطة يداوي بيها الداء والجراح.. لأنه ببساطة بيسبقه لقب مواطن وده شيء طبعاً مكروه في بنوك الانفتاح.. ولا عنده لنش يقدر يهرب فيه ساعة الفجر لو الديك صاح.. ولا له حبايب في لندن يروح ليهم لو الموضوع كبر والسر انفضح وفاح.. ببساطة المواطن كفاية عليه انه يبقى زي القفل وينسى موضوع المفتاح.. وهي الدنيا كدة ناس تكد وتتعب ومش لاقية اللضى وناس تاكل زبدة وتفاح.. وناس تدفع شقاها ضريبة علشان البيه المستثمر يرتاح.. دنيا لا بتخلي الراكب راكب ولا المواطن الغلبان مرتاح..!! السادة رجال الأعمال في بلدنا ليهم نظام كتير عجيب.. رغم إن البلد ما شاء الله سهلت ليهم كل القوانين وخلت لهم كل شيء بعيد قريب.. وكان الأمل ينعشوا البلد ويقللوا طابور البطالة الرهيب.. لكن اللي حصل كان عكس كل التوقعات وغريب.. لا شفنا عمالة اشتغلت وحتى العمالة الموجودة حصل لها تسريب.. وشفنا سيناريوهات لتسريح العمالة بكل وسائل الاغراء والترغيب.. وإن رفضوا يبدأ سيناريو الوعيد والترهيب.. والنتيجة آلاف من العمالة في الشارع بفضل قانون الاستثمار العجيب.. ناس عارفة بتعمل ايه ومن أين تؤكل الكتف وليه لأ مدام لا فيه حسيب ولا رقيب.. ولازم يحصل كده مدام زيتنا بقى في دقيقنا وبقوا للحكومة نسايب ومن المحاسيب.. مولد وصاحبه غايب والمكسب على عينك ياتاجر حلال لكل مستثمر وحبيب.. وتلاقي يا أخي حكومة مخلوطة بهوامير البيزنس بيافطة مكتوب عليها ممنوع الاقتراب لأي غريب.. حتى اللجان البرلمانية مباحة بمنتهى السماحة والترحيب.. وكله قانوني وشرعي وكوكتيل عجيب ومريب..!! والغريب اللي تشوفه عن المزايا وفترة السماح الممنوحة للسادة المستثمرين.. إعفاءات وتسهيلات وأبواب مفتوحة في كل الميادين.. وياريتهم بعد كل الهيصة دي تلاقيهم منضبطين.. أو حتى للضرائب وحق الدولة عليهم ملتزمين.. أو بيشاركوا في المشاريع اللي بتخدم المواطنين.. زي مستشفى تعالج الناس البسيطة الغلبانين.. أو مدرسة نعلم فيها ولاد الناس المطحونين.. أو طرح مشروعات بسيطة لشباب الجامعة العاطلين.. أو رصف شارع وإنارة طريق أو حتى بناء ملجأ أو دار مسننين..!! إحدى شركات المحمول أعلنت عن ايراداتها السنوية.. وأتاريها بسم الله ما شاء الله تعدت الـ 5 مليارات أرباح من الجنيهات المصرية.. كل ده من الكلام في الهوا والثرثرة في الرايحة والجاية.. المهم فين حق الدولة من كل الأرباح الخرافية.. وايه التقدير الحقيقي وقيمة حصتها الضريبية.. وهل يجوز حد يكسب زي ما يحب من غير أي بصمة جماهيرية.. حيحصل ايه لو ألزمناها هي وغيرها بتخصيص قدر من أرباحها لاقامة مشروعات وخدمات وطنية.. وللا حيقولوا عليها أفكار عبيطة اشتراكية.. يعني ايه شركة تكسب مليارات من غير اي مساهمة في مشاريع خدماتية.. وليه واحد بس يكون له الحق في انشاء شركة احتكارية.. تخيل لو الدولة سمحت للمواطنين بإنشاء شركات جبارة منافسة للشركات الاحتكارية.. شركات للمواطنين فقط بعيد عن رجال الأعمال وأساليبهم الملتوية.. زي المحمول والحديد والاسمنت وكل السلع الاستراتيجية.. ياترى دي فكرة عبيطة وللا حيقولوا رجز من عمل الشيطان وأفكار وثنية.. السيد بوتين رئيس الوزراء في دولة روسيا انتقد رجال أعمال لعدم مساهمتهم في خدمة الناس بمساهمة جدية.. بعد تقديم كل الدعم ليهم والتسهيلات وفترة سماح زمنية.. واحنا ما شاء الله نوهب ليهم كل التسهيلات والمنح المجانية.. ولا نسأل بعد كدة عن سقف الأرباح ولا نعرف راحت فين هي.. ولا نلاقي ليهم محاسبة ضريبية عادلة بالطريقة التصاعدية.. حرام ناس يضيع عمرها وناس تلهط خيرنا زي القشطة بالمهلبية.. فين قسمة العدل وفين المصداقية..!! الخلاصة لازم خير بلدنا يكون لينا كلنا.. والسادة اللي احتكروا أرزاقنا لازم يراعوا فينا ربنا.. وحكومتنا الرشيدة لازم تجيب حصتنا وشقانا وحقنا.. وحقنا فصل في مدرسة أو سرير في مستشفى أو مشروع وطني يلمنا..!! صعب نعيش حياتنا نفضل ندفع فواتير.. صعب نعيش حياتنا من غير تغيير.. صعب نبيع بلدنا ببلاش للسادة الهوامير.. والأصعب علينا نفضل نعيش طراطير..!!
Said_elmasry fahmy@hotmail.com
الله يجازي ويسامح اللي نصحنا باللي اسمه الانفتاح.. واللي خلى ناس نزلت علينا من السما وبالنفوذ والمصالح كل شيء بقى ليهم مباح.. واللي انفتحت ليهم أبواب السما والأرض والمسألة بقت سداح مداح.. وطاحوا علينا في كل المجالات وخير بلدنا بقى داخل جيوبهم كل صباح.. يا أخي تلاقيهم في كل المجالات وكل شيء بقى ليهم متاح.. وهدفهم لذيذ قوي وظريف بيسموه اللي اسمه إيه ده ولا موأخذه الاصلاح.. وغريبة يا أخي تلاقي البنوك بتمولهم بالملايين مع خالص التحية وفوق البيعة فترة سماح.. والمواطن الغلبان لا يقدر ياخد سلفة بسيطة يداوي بيها الداء والجراح.. لأنه ببساطة بيسبقه لقب مواطن وده شيء طبعاً مكروه في بنوك الانفتاح.. ولا عنده لنش يقدر يهرب فيه ساعة الفجر لو الديك صاح.. ولا له حبايب في لندن يروح ليهم لو الموضوع كبر والسر انفضح وفاح.. ببساطة المواطن كفاية عليه انه يبقى زي القفل وينسى موضوع المفتاح.. وهي الدنيا كدة ناس تكد وتتعب ومش لاقية اللضى وناس تاكل زبدة وتفاح.. وناس تدفع شقاها ضريبة علشان البيه المستثمر يرتاح.. دنيا لا بتخلي الراكب راكب ولا المواطن الغلبان مرتاح..!! السادة رجال الأعمال في بلدنا ليهم نظام كتير عجيب.. رغم إن البلد ما شاء الله سهلت ليهم كل القوانين وخلت لهم كل شيء بعيد قريب.. وكان الأمل ينعشوا البلد ويقللوا طابور البطالة الرهيب.. لكن اللي حصل كان عكس كل التوقعات وغريب.. لا شفنا عمالة اشتغلت وحتى العمالة الموجودة حصل لها تسريب.. وشفنا سيناريوهات لتسريح العمالة بكل وسائل الاغراء والترغيب.. وإن رفضوا يبدأ سيناريو الوعيد والترهيب.. والنتيجة آلاف من العمالة في الشارع بفضل قانون الاستثمار العجيب.. ناس عارفة بتعمل ايه ومن أين تؤكل الكتف وليه لأ مدام لا فيه حسيب ولا رقيب.. ولازم يحصل كده مدام زيتنا بقى في دقيقنا وبقوا للحكومة نسايب ومن المحاسيب.. مولد وصاحبه غايب والمكسب على عينك ياتاجر حلال لكل مستثمر وحبيب.. وتلاقي يا أخي حكومة مخلوطة بهوامير البيزنس بيافطة مكتوب عليها ممنوع الاقتراب لأي غريب.. حتى اللجان البرلمانية مباحة بمنتهى السماحة والترحيب.. وكله قانوني وشرعي وكوكتيل عجيب ومريب..!! والغريب اللي تشوفه عن المزايا وفترة السماح الممنوحة للسادة المستثمرين.. إعفاءات وتسهيلات وأبواب مفتوحة في كل الميادين.. وياريتهم بعد كل الهيصة دي تلاقيهم منضبطين.. أو حتى للضرائب وحق الدولة عليهم ملتزمين.. أو بيشاركوا في المشاريع اللي بتخدم المواطنين.. زي مستشفى تعالج الناس البسيطة الغلبانين.. أو مدرسة نعلم فيها ولاد الناس المطحونين.. أو طرح مشروعات بسيطة لشباب الجامعة العاطلين.. أو رصف شارع وإنارة طريق أو حتى بناء ملجأ أو دار مسننين..!! إحدى شركات المحمول أعلنت عن ايراداتها السنوية.. وأتاريها بسم الله ما شاء الله تعدت الـ 5 مليارات أرباح من الجنيهات المصرية.. كل ده من الكلام في الهوا والثرثرة في الرايحة والجاية.. المهم فين حق الدولة من كل الأرباح الخرافية.. وايه التقدير الحقيقي وقيمة حصتها الضريبية.. وهل يجوز حد يكسب زي ما يحب من غير أي بصمة جماهيرية.. حيحصل ايه لو ألزمناها هي وغيرها بتخصيص قدر من أرباحها لاقامة مشروعات وخدمات وطنية.. وللا حيقولوا عليها أفكار عبيطة اشتراكية.. يعني ايه شركة تكسب مليارات من غير اي مساهمة في مشاريع خدماتية.. وليه واحد بس يكون له الحق في انشاء شركة احتكارية.. تخيل لو الدولة سمحت للمواطنين بإنشاء شركات جبارة منافسة للشركات الاحتكارية.. شركات للمواطنين فقط بعيد عن رجال الأعمال وأساليبهم الملتوية.. زي المحمول والحديد والاسمنت وكل السلع الاستراتيجية.. ياترى دي فكرة عبيطة وللا حيقولوا رجز من عمل الشيطان وأفكار وثنية.. السيد بوتين رئيس الوزراء في دولة روسيا انتقد رجال أعمال لعدم مساهمتهم في خدمة الناس بمساهمة جدية.. بعد تقديم كل الدعم ليهم والتسهيلات وفترة سماح زمنية.. واحنا ما شاء الله نوهب ليهم كل التسهيلات والمنح المجانية.. ولا نسأل بعد كدة عن سقف الأرباح ولا نعرف راحت فين هي.. ولا نلاقي ليهم محاسبة ضريبية عادلة بالطريقة التصاعدية.. حرام ناس يضيع عمرها وناس تلهط خيرنا زي القشطة بالمهلبية.. فين قسمة العدل وفين المصداقية..!! الخلاصة لازم خير بلدنا يكون لينا كلنا.. والسادة اللي احتكروا أرزاقنا لازم يراعوا فينا ربنا.. وحكومتنا الرشيدة لازم تجيب حصتنا وشقانا وحقنا.. وحقنا فصل في مدرسة أو سرير في مستشفى أو مشروع وطني يلمنا..!! صعب نعيش حياتنا نفضل ندفع فواتير.. صعب نعيش حياتنا من غير تغيير.. صعب نبيع بلدنا ببلاش للسادة الهوامير.. والأصعب علينا نفضل نعيش طراطير..!!
Said_elmasry fahmy@hotmail.com
