على الفطره
طفح كيل الدليل وكبرت الحجه على البرهان
وانا ثابت واشاهد والحقيقة شاهد اثباتي
على الفطره ما احب المفتري بالزيف والبهتان
فطرني من يوايق فوق سياتي وحسناتي
ادور للصراحه طرقها واكوسر الالحان
ولا تقبل تصاريحي تخلا عن صراحاتي
عسى الله يقطع لساني ويتركني بدون لسان
ليا بالغت في همي وفي واقع معاناتي
نشف دم القصيد وذاب مدري شابت القيفان
سكن كله عسى تدفع حركاته... حركاتي
اغني مع مسيرات الحوادث لين وقتي شان
وجاب اصعب حدث واخطر مسيره من مسيراتي
مصاب ومستصيب وضربة في معقل الوجدان
وانا اعلنت الطواري عقب ما نكست راياتي
على ضيق التنفس وانحباس الدم فالشريان
وزفرات تروح ولا تمثنت خاطري تآتي
شهقت وقلت ياربي فنيت وكل خلقك فان
لكن احسن خواتيمي... وعفوك عن بداياتي
احسب اني زناتي في المحبة واحكم الميدان
واثر ما في المحبة والغرام وحربة زناتي!
الا يا خلي اللي من عرفتك سيد الخلان
ومن ساد الحبايب والقرايب سيد ساداتي
فراقك ولع بصدري لهيب وشعلة ودخان
وخلف في ضلوعي قنبلة تفجيرها ذاتي!
كذا بالشمع الاحمر عن حبيبك تقفل البيبان
ولا حتى تبي تسمع صدى نوحي ووناتي
ثلاث سنين اردد «لا عدمتك» لين فقدك حان
وعدمتك آه يا كبر المصاب ما اكثر آهاتي
بغيت ابكي وانا خابر دموعي من ثلاث الوان
ولا ادري باي لون اهل من فرقاك عبراتي؟
احبك... لا ما احبك... لا احبك صبتني بجنان
وانا اكثر عاشق عاقل في تاريخ العلاقاتي!
تقول انك مثبت لاتجاه الحب ماجلان
تحاصرني وتظهر لي على كل اتجاهاتي
بقت كلمة وشايلها معي بسم الله الرحمن
ليا منه سلم منها لساني تجرح شفاتي
عزيز وهيبتي تبقى عزيزة والذليل مهان
حفظت اغلى كنوز الأرض في ذمة قناعاتي
ولو نعرض علاقتنا على لجنة حقوق إنسان
تبي تحكم عليك بحكمها وتقرر الآتي
عليك تعود لي والا عسى ما تنجزي باحسان
قريت الفاتحة وازريت لا تقرا التحياتي.
