أمد لك يمناي

ياصاحبي إلى متي حد جفا عطني قرار

محتاج لك تعطف واذا تقسى ضميرك حاسبه

هدد حياتي بالملل عمر الزمن بالانتظار

اصرخ كفا حزن الجفا قلبك عذابي عاجبه

تدري وكنك ما دريت تشوف حالي كيف صار

تحرمني العطف الحنان صيفك حرقني لاهبه

جيتك ضميت مواصلك صحرا وجففها النهار

وابحر بحبك ضامين والموج حطم قاربه

قاسي متى متى تلين والحب ما كان اختيار

ميلادنا كان اللقا لحظة محبة جاذبة

غير من الواقع ترى بالواقع الحالي مرار

حس بمشاعر تشتكي عنها السعادة هاربه

لا تنكر العهد الوفا لا تعتذر مابي اعتذار

مللني الوهم الوعد مشاعري متضاربة

امد لك يمناي ظل تمد لي يمناك نار

لاسالمك قلبي تجي بالمستحيل اتحاربه

مدري تغلا بالجفا مدري الجفا لي اختبار

مدري تبيني ابتعد من شان غيري اتقاربه

ما هانت العشرة علي تاخذني الغيرة واغار

ما هو انا اللي لاوفا يرجع يخون بصاحبه