هذي الحقيقة...!

قولي اخونك خلي القلب يرتاح

قوليها مره يالله وريحيني

قوليها عادي لوها بلهجة امزاح**

خليها رادع يكسر اشواق عيني

ولا لا يهمك لو اشب كلي اجراح

مجروح خلقه ما اجرحتني سنيني

الهم اصبح في حناياي فلاح

يحصد فرح عمري ويروي انيني

والآه والله في وسط صدري ارماح

منها أموت وهيّه بتموت فيني

يعني كذا مجروح مبطي ولا راح

تثّر جروحك فيني لو تجرحيني

هذي الحقيقة واضحة كل الايضاح

بالمختصر ما بيك ما تنفعيني

لاني انا شكيت والشك ذباح

ودايم شكوكي تتفق مع يقيني

روحي وخلي القلب فالهم سواح

وعني بعد هاليوم لا تسأليني

حبنا غدى ماضي وكل يوم اذا راح

وشلون يرجع بس..؟ وانتي افهميني

بطلبك انا حاجة وكررها بلحاح

قبل الفراق ارجوك بس اسمعيني

قولي اخونك خلي القلب يرتاح

خلي شكوكي تنكسر في يقيني