منديل لكن

| شعر غازي بن مشعل |

تنظر لي ابضحكه وانا فيك مفتون

وأبكي ولامديت لبكاي منديل

يمكن يواسيني إذا كنت مغبون

ويكون لرحمه على الدمع تأويل

منديل لكن فالهوا يمكن يكون

أرض أزهرت وإتزينت من عقب سيل

لاصار شوفه راحت إحساس وعيون

يكفي وانا ماني بطماع بالحيل

أطمع تمد إيديك منديل وإتهون

كل الجروح وينقطع دابر الليل

شف مطمع العاشق وهو منك مطعون

يا مصغر إجروحه عقب كل ما قيل

يجزاني الله خير لو كنت محزون

تجرح وانا ألحن بجرحي مواويل

لاتحسب إني في الهوا صرت مجنون

هجر الوليف يزيدني قوه وحيل

غرك حلاك وقولتي لك: يامزيون

ماتدري ان الحب صدق الرياجيل

زدتك غلا وانت أشبه البيت موزون

لو ظفت له حرف انكسر بالمفاعيل

كان الغرور أعماك ماني لك اعيون

وكان النهار أظواك لاتامن الليل

واعلم ترا للوقت تكشيرة إسنون

منها تذوق الشر والمر والويل

لابد الاحيا فالزمان إيتلاقون

وألقاك تبكي دم. واعطيك منديل