يا كبرها منك

يا ناوي البعد... عنك البعد يسعدني

أبشر برجل يعز النفس ببعاده

مليت منك الغرام اللي امجاهدني

بنسى وفاته... وأعيش أيام ميلاده

دايم بحبك على الفرقا... تهددني

واليوم خد ما تبي من... كف وراده

باكر اليا طال معك الوقت تفقدني

واتعرف من كان منصح لك من أفواده

تلقى جواب عليه العام تنشدني

وان الرياجيل فيها نقص وازيادة

وتحس بالنقد كانك قبل تنقدني

واتميز الحق مصداره وميراده

كنت احسب الوقت عنك ما يبعدني

واثريك ودك يزيد الوقت بعناده

نسيت عهدك معي يومك تعاهدني

يوم ان نفسك معي للحب منقاده

كلن على عشرتي وياك حاسدني

حتى اقرب الناس حساده ونقاده

ياكبرها منك بس اللي امعقدني

وشلون شخص عطاك الحب... مافاده!

عيت اظنوني بحبك لا تساعدني

مات الغلا... واعلنه للناس بحداده

برحل لحب على العزه يواعدني

واخلي الشوق ناره دوم... وقاده

حب صدوق بعطفه ما يعاندني

يعوضني في غرام زاد بجهاده

قلبي علي اللي يبيه اليوم يرشدني

ابكسب ارضاه... واتباع كل ما راده

ولاهي غريبة ظروفي ما تساندني

دايم ونفسي علي الصدمات... معتاده