عمر ثانٍ...!

ليل هاك الجدايل طال مسراه
بين تفسير حلم وبين اماني
يوم حد الغلا قلبي على اقصاه
شرع القلب بيبان المحاني
ما رماني، ولكن قلبي ادماه
عاد وشلون لا منه رماني
لا نقضى ليل مجدوله وخلاه
قلت وش هالظلام اللي غشاني
لو يمر البحر شاطي شفاياه
صار بحر الخليج فرات ثاني
وين ابلقاه... مدري وين ابلقاه
دامه بكل ذره في كياني
ادري انه نسى الموعد ولا جاه
بس ليته نساه ولا نساني
لو عيونه بحرهن ما ركد ماه
شط الاهداب صار اجمل مواني
يكفي انه حفظ شعري وغناه
وابتسملي وقال ادري عشاني
كل ما ترتسم بسمة على شفاه
اشعر انه يجاملني زماني
ليه احبه واحب اسمه وطرياه
يوم اخذ دم قلبي وش عطاني
غاب وان شفت نفسي قادر انساه
قلت ربي كتب لي عمر ثاني
متعب التركي