اعذريهم واعذريني

يا بنت، لو شفتي لك أقمار، ونجوم
عمر الأسامي، ما تخلد قصيده
لو ما البياض بداكن الحرف ملزوم
تاه الزمن، والذاكره في وريده
يا كثرهم ناس لك انطيح، وتقوم
تجمعوا للنور، كل يريده
رغم المكان اللي بهم صار مزحوم
تشابهوا، وانتي بقيتي وحيده
تسمعي صوت للانصاف مسموم
من لهجة لسان القهر والمكيده
منه الرضا، لو مات ما هوب مرحوم
في سادته، لا حد يعزي عبيده
صدر القلم لو بأزرق الحبر مكتوم
يلقى النفس في موت صفحة جديده
وش ينفع المشهور لا صار مذموم؟
يا بنت، دولاب الزمن من يعيده؟
فيه اعذريهم، واعذريني مع القوم
ما أملك اجابات القلوب البليده
باكر، يسولف بين معطي ومحروم
سر من أغوار السنين البعيده
عنه اسأليهم واسأليني عن اليوم
كم من أسامي؟ خلدتها قصيدة!
هلال المطيري