نقطة عسل

حقق برنامج «المؤشر» على تلفزيون الكويت في التاسعة من صباح كل يوم من تقديم ندى حطيط والعسل مو حق ندوية اذ انها شكل حلو وبس، عسل أم ملكات النحل حق مراسل البرنامج في البورصة عايد العنزي إذ انه همه مو بقلبة بل مطلعة بكلامه ،فهو يصك الشركات الاستثمارية لسعة.. عالواقف، ويعطيهم كااااش لانهم مطنشين المساهمين المحليين ومايعطونه أخبارهم بل ويرسلون أخبارهم للمواقع الالكترونية لبورصات دبي وقطر ، يا حلو عايد .. هالمسكين داااااخ وهو يدور على الشفافية والوضوح من الشركات مع المساهمين الكويتيين، وعلى الرغم من تكرار شكاويه الا إن سوق الكويت للاوراق المالية المسؤول عن سوالف البورصة عمك أصمخ ولا يفرض عالشركات ضرورة إعلام الناس عبر وسائل إعلامهم المحلية، وأحلى مافي عايد هي عفويته فعلاقته مقطوعة مع فن الإلقاء... لا وقف ولا نفس ولا تلون بصوته ، ينطلق بوقته القصير كأنه طلقات رصاص كلاشينكوف يآكل نهايات الحروف كأنه يوعاااااان... تريق زين يمه... خذ لك صمون طماط بطاط بذنجان وفوقهم دقوس بو ديج وقدم لنا تقاريرك الميدانية الحلوة يا شبّ ياللي بح صوتك وإنته تطلب الشفافية... هذيله مو ويه شفافية لأنهم عبالهم الشفافية قميص نوم حريمي .. كيييييع كااااااع كووووووع كركنع ..
نحلة