في جنة الفردوس

رثاء في الوالد العزيز فقيد الكويت وقبيلة العجمان هيف سعد الحجرف، رحمه الله واسكنه فسيح جناته.
يالله يا خالق من المي الانسان
يا من له الدنيا وحن نرتجيله
اجبر عزا عبدك ولو كان خسران
يا مالكن الكون وانت وكيله
انا اشهد اني اليوم ماني بطربان
علم لفاني زاد كبدي غليله
قالوا توفى درعنا هيف السمان
زيزوم يام في نهار الوهيله
حطوا على قبره علامة ونيشان
لعل قبره تغتشيه المخيله
يبكي على هيف شيب وشبان
ويبكون على هيف شيوخ القبيلة
والعود ينبت بعده اليوم عيدان
ولا خاب ظني في الهضاب الظليلة
تاريخهم يشهد على كاين كان
واقول قولن عارفين دليله
عجمان لا منه رقص كل شيطان!!
تعرف مواقفهم بيوم الوهيله
عزي لقوم ما لها زحول واركان
يضيع عايلها على كل ميله
يضيع حقه بين كذب وبهتان
يقفي على حقه وعينه تخيله
خلوني اعبر على كل ميدان
برق على الجهرا وكل يخيله
يمطر عليهم دايم الدوم والدان
يكفيك من بعض المطر قوسيله
مرحوم يا هيف لك المجد عنوان
بين الرفاقه وافين بتعديله
يمشي بدرب المرجلة سر واعلان
ما هو بطراد الامور الرذيلة
دله على درب الوفا عالي الشان
اسمه ورسمه في المكارم دليله
ساس الوفا ساس الكرم بيت الاحسان
في جنة الفردوس ينزل نزيله
يا عل مدخاله مع باب رضوان
دايم مع الابرار يومه وليله
وصلاة ربي عد ما هل ودان
على النبي ما هل وبل المخيله
حماد محمد الشغبان العجمي