سافرت بعيوني

دار الكلام... وطال بيني وبينك
والشوق معطينا مفاتيح بيته
يا للي تسوق احساسك... الله يعينك!
لقيت فيك احساس ما قد لقيته
لا ما سمعتك يوم سولف حنينك
واللي يدور بخاطري ما حكيته
مدري خذتني منك طلة جبينك؟!
والا انت معجبك الخفوق وخذيته؟!
والا اشغلتني عنك لمسة يمينك؟
يوم احتوتني بالدفا... واحتويته
شف كيف تغريني سواليف عينك!
واقرا بها اللي من زمن ما قريته
سافرت بعيونك على وجنتينك
والدرب من بين الملامح مشيته
وادري يمتعني امتابع يدينك
والشوق حاضر... وان بغيته دعيته
وادور الراحة على راحتينك
واقول ليته... ثم ليته... وليته
ويا ليتني ما اقول بعدين (وينك؟)
وان قلتها... يا ليت من غاب جيته
واعرف رضا الله من رضا والدينك
وان رضاي اليا رضى من هويته
سولف علي... الله معك لا يهينك
والمعذرة كان الغلا ما قويته
اكثر كلامك ذاب من شفتينك
واللي خذيته منك شفني عطيته
عيدالكلام! وهات قصة اسنينك
ويا ليت لا عدته عليه... نسيته
مشاعر نجد