| ميادة مدحت |
الارض بتتكلم ايه؟
الارض بتتكلم عربي
الارض بتتألم ليه
والدمع مغرقها يا ربي
*
الصادق مبقاش له صوت
وانين الاحلام مكبوت
والعرش جماجم وتابوت
نايم فيه الشعب العربي
*
الارض بتتلوى حنين
للفارس ابو قلب حزين
المسجون في حواري بلاده
التايه وسط الخايفين
*
الزرع بينزف مواويل
تتوجع من جرح النيل
وتنادي على شعب ... زمان
كان شمس بتتحدى الليل
*
الاحزاب ساكنة فلسطين
والواقع مؤلم وحزين
ان الاخ بيقتل اخوه
والعدو طايح ف الاثنين
*
يا سوداننا يا مبدور زنازين
ليه قمرك مجروح وحزين
ليه دمك فايض بزيادة
فين نيلك رايح على فين؟
*
وعراقنا مبقاش عربي
بقى شيعي وسني وحربي
بقى غابة وسط ديابة
بتقطع قلبي العربي
*
الارض بتتكلم ايه
الارض بتتكلم عربي
الارض بتتألم ليه
وحاكمها متهني يا ربى؟ |